🚨 ਵੱਡੀ ਖ਼ਬਰ: ਜਲੰਧਰ ਤਹਿਸੀਲ 'ਚ 'ਪਟਵਾਰੀ ਜੋੜੇ' ਦੇ ਚਰਚੇ, ਮਹਿੰਗੇ ਇਲਾਕਿਆਂ 'ਚ ਬੇਮਿਸਾਲ ਸੈਟਿੰਗ ਨੇ ਉਡਾਏ ਸਭ ਦੇ ਹੋਸ਼!

ਜਲੰਧਰ, ਲੋਕ ਬਾਣੀ -- 

ਪੰਜਾਬ ਸਰਕਾਰ ਵੱਲੋਂ ਭ੍ਰਿਸ਼ਟਾਚਾਰ ਅਤੇ ਤਹਿਸੀਲ ਕੰਪਲੈਕਸਾਂ ਵਿੱਚ ਚੱਲ ਰਹੀਆਂ ਗੜਬੜੀਆਂ ਖ਼ਿਲਾਫ਼ ਵਿੱਢੀ ਮੁਹਿੰਮ ਦੇ ਵਿਚਕਾਰ ਹੁਣ ਜਲੰਧਰ ਦੀ ਤਹਿਸੀਲ ਵਿੱਚ ਇੱਕ 'ਪਟਵਾਰੀ ਜੋੜੇ' ਦੇ ਚਰਚੇ ਦੀਆਂ ਗੱਲਾਂ ਤੇਜ਼ ਹੋ ਗਈਆਂ ਹਨ। ਸੂਤਰਾਂ ਦੇ ਹਵਾਲੇ ਤੋਂ ਮਿਲੀ ਜਾਣਕਾਰੀ ਮੁਤਾਬਕ, ਇਸ ਜੋੜੀ ਦੀ ਆਪਸੀ ਕੰਮ ਕਰਨ ਦੀ 'ਬੇਮਿਸਾਲ ਸੈਟਿੰਗ' ਨੇ ਤਹਿਸੀਲ ਦੇ ਅੰਦਰ ਅਤੇ ਬਾਹਰ ਵੱਡੇ ਚਰਚੇ ਛੇੜ ਦਿੱਤੇ ਹਨ।

ਮਹਿੰਗੇ ਇਲਾਕਿਆਂ 'ਤੇ ਪੂਰੀ ਪਕੜ, ਆਖਰ ਕਿਸਦੀ ਹੈ ਪੂਰੀ ਸਪੋਰਟ?

ਦੱਸਿਆ ਜਾ ਰਿਹਾ ਹੈ ਕਿ ਜਲੰਧਰ ਦੇ ਸਭ ਤੋਂ ਪੌਸ਼ ਅਤੇ ਮਹਿੰਗੇ ਇਲਾਕਿਆਂ ਦਾ ਸਾਰਾ ਰਿਕਾਰਡ ਅਤੇ ਕੰਮਕਾਜ ਇਸੇ ਜੋੜੀ ਦੇ ਆਲੇ-ਦੁਆਲੇ ਘੁੰਮਦਾ ਹੈ। ਵੱਡੀਆਂ-ਵੱਡੀਆਂ ਡੀਲਾਂ ਅਤੇ ਜ਼ਮੀਨੀ ਇੰਤਕਾਲਾਂ ਵਿੱਚ ਇਨ੍ਹਾਂ ਦੀ ਸੈਟਿੰਗ ਇੰਨੀ ਮਜ਼ਬੂਤ ਹੈ ਕਿ ਪਰਿੰਦਾ ਵੀ ਪਰ ਨਹੀਂ ਮਾਰ ਸਕਦਾ। ਹੁਣ ਸਭ ਤੋਂ ਵੱਡਾ ਸਵਾਲ ਇਹ ਉੱਠ ਰਿਹਾ ਹੈ ਕਿ ਆਖਰ ਇਸ ਜੋੜੀ ਦੇ ਸਿਰ 'ਤੇ ਕਿਸ ਵੱਡੇ ਰਸੂਖਦਾਰ ਜਾਂ ਉੱਚ ਅਧਿਕਾਰੀ ਦਾ ਹੱਥ ਹੈ? ਕਿਸ ਦੀ ਪੂਰੀ ਸਪੋਰਟ ਸਦਕਾ ਇਹ ਜੋੜੀ ਲੰਮੇ ਸਮੇਂ ਤੋਂ ਇੰਨੀ ਬੇਖ਼ੌਫ਼ ਹੋ ਕੇ ਆਪਣਾ ਨੈੱਟਵਰਕ ਚਲਾ ਰਹੀ ਹੈ?

ਜਲਦ ਹੋਵੇਗਾ ਵੱਡਾ ਖੁਲਾਸਾ!

ਵਿਜੀਲੈਂਸ ਬਿਊਰੋ ਵੱਲੋਂ ਜਲੰਧਰ ਤਹਿਸੀਲ ਵਿੱਚ ਪਹਿਲਾਂ ਹੀ ਕਈ ਵੱਡੀਆਂ ਮੱਛੀਆਂ 'ਤੇ ਸ਼ਿਕੰਜਾ ਕੱਸਿਆ ਜਾ ਚੁੱਕਾ ਹੈ। ਅਜਿਹੇ ਵਿੱਚ ਇਸ ਪਟਵਾਰੀ ਜੋੜੀ ਦੇ ਕਾਰਨਾਮੇ ਅਤੇ ਉਨ੍ਹਾਂ ਦੀਆਂ 'ਖ਼ਾਸ ਸੈਟਿੰਗਾਂ' ਦੀ ਗੱਲ ਹੁਣ ਉੱਚ ਅਧਿਕਾਰੀਆਂ ਦੇ ਦਰਬਾਰ ਤੱਕ ਪਹੁੰਚ ਚੁੱਕੀ ਹੈ। ਸੂਤਰ ਦੱਸਦੇ ਹਨ ਕਿ ਜਲਦ ਹੀ ਇਸ ਜੋੜੀ ਦੇ ਚਰਚੇ ਆਮ ਤੋਂ ਖ਼ਾਸ ਹੋਣ ਵਾਲੇ ਹਨ ਅਤੇ ਕਿਸੇ ਵੀ ਵੇਲੇ ਇਨ੍ਹਾਂ ਦੀ ਅਸਲੀਅਤ ਅਤੇ ਇਨ੍ਹਾਂ ਦੇ ਪਿੱਛੇ ਬੈਠੇ ਸਪੋਰਟਰਾਂ ਦੇ ਨਾਮ ਜਨਤਕ ਹੋ ਸਕਦੇ ਹਨ।

ਤਹਿਸੀਲ ਦੇ ਬਾਕੀ ਸਟਾਫ਼ ਅਤੇ ਆਮ ਲੋਕਾਂ ਵਿੱਚ ਵੀ ਹੁਣ ਇਸ ਜੋੜੀ ਨੂੰ ਲੈ ਕੇ ਕਈ ਤਰ੍ਹਾਂ ਦੀਆਂ ਕਾਨਾਫੂਸੀਆਂ ਸ਼ੁਰੂ ਹੋ ਗਈਆਂ ਹਨ। ਦੇਖਣਾ ਹੋਵੇਗਾ ਕਿ ਆਉਣ ਵਾਲੇ ਦਿਨਾਂ ਵਿੱਚ ਇਸ ਮਾਮਲੇ ਵਿੱਚ ਕੀ ਨਵਾਂ ਮੋੜ ਆਉਂਦਾ ਹੈ।