ਨਿਊ ਦਿੱਲੀ/ਲੋਕ ਬਾਣੀ 

ਭਾਰਤੀ ਥਲ ਸੈਨਾ ਮੁਖੀ (COAS) ਜਨਰਲ ਉਪੇਂਦਰ ਦਿਵੇਦੀ 16 ਤੋਂ 19 ਫਰਵਰੀ 2026 ਤੱਕ ਆਸਟਰੇਲੀਆ ਦੇ ਅਧਿਕਾਰਤ ਦੌਰੇ ’ਤੇ ਜਾ ਰਹੇ ਹਨ। ਇਸ ਦੌਰੇ ਦਾ ਮੁੱਖ ਉਦੇਸ਼ ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਰੱਖਿਆ ਸਹਿਯੋਗ ਨੂੰ ਮਜ਼ਬੂਤ ਕਰਨਾ ਅਤੇ ਦੋਵਾਂ ਦੇਸ਼ਾਂ ਦੀ ਫੌਜਾਂ ਵਿਚਾਲੇ ਸਿਖਲਾਈ, ਸਾਂਝੀਆਂ ਜੰਗੀ ਮਸ਼ਕਾਂ ਅਤੇ ਪੇਸ਼ੇਵਰ ਅਦਾਨ-ਪ੍ਰਦਾਨ ਨੂੰ ਵਧਾਉਣਾ ਹੈ।ਆਪਣੇ ਸਿਡਨੀ ਦੌਰੇ ਦੌਰਾਨ, ਜਨਰਲ ਦਿਵੇਦੀ ਸਪੈਸ਼ਲ ਅਪਰੇਸ਼ਨ ਕਮਾਂਡ ਅਤੇ ਸੈਨਾ ਦੀ ਦੂਜੀ ਡਿਵੀਜ਼ਨ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ। ਜ਼ਿਕਰਯੋਗ ਹੈ ਕਿ ਦੂਜੀ ਡਿਵੀਜ਼ਨ ਦੀਆਂ ਟੁਕੜੀਆਂ ਭਾਰਤ-ਆਸਟਰੇਲੀਆ ਦੁਵੱਲੇ ਫੌਜੀ ਅਭਿਆਸ ‘ਆਸਟਰਾ-ਹਿੰਦ’ (AUSTRAHIND) ਵਿੱਚ ਹਿੱਸਾ ਲੈਂਦੀਆਂ ਹਨ, ਜਿਸ ਦਾ ਅਗਲਾ ਪੜਾਅ 2026 ਵਿੱਚ ਭਾਰਤ ਵਿੱਚ ਹੋਣ ਵਾਲਾ ਹੈ।ਕੈਨਬਰਾ ਪਹੁੰਚਣ ’ਤੇ ਜਨਰਲ ਦਿਵੇਦੀ ਦਾ ‘ਗਾਰਡ ਆਫ ਆਨਰ’ ਨਾਲ ਸ਼ਾਨਦਾਰ ਸਵਾਗਤ ਕੀਤਾ ਜਾਵੇਗਾ, ਜਿਸ ਤੋਂ ਬਾਅਦ ਉਹ ਆਸਟਰੇਲੀਆਈ ਸੈਨਾ ਦੇ ਮੁਖੀ ਲੈਫਟੀਨੈਂਟ ਜਨਰਲ ਸਾਈਮਨ ਸਟੂਅਰਟ ਨਾਲ ਮੁਲਾਕਾਤ ਕਰਨਗੇ। ਦਿਲਚਸਪ ਗੱਲ ਇਹ ਹੈ ਕਿ ਦੋਵੇਂ ਮੁਖੀ ਯੂ.ਐੱਸ. ਆਰਮੀ ਵਾਰ ਕਾਲਜ (ਬੈਚ 2015) ਦੇ ਸਹਿਪਾਠੀ ਰਹਿ ਚੁੱਕੇ ਹਨ।ਆਪਣੇ ਇਸ ਦੌਰੇ ਦੌਰਾਨ ਉਹ ਆਸਟਰੇਲੀਆਈ ਰੱਖਿਆ ਬਲਾਂ ਦੇ ਹੈੱਡਕੁਆਰਟਰ ਵਿਖੇ ਆਧੁਨਿਕੀਕਰਨ ਅਤੇ ਭਵਿੱਖੀ ਅਪਰੇਸ਼ਨਾਂ ’ਤੇ ਚਰਚਾ ਕਰਨਗੇ, ਜੰਗੀ ਯਾਦਗਾਰ ’ਤੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕਰਨਗੇ ਅਤੇ ਆਸਟ੍ਰੇਲੀਆ ਵਿੱਚ ਰਹਿ ਰਹੇ ਭਾਰਤੀ ਸਾਬਕਾ ਫੌਜੀਆਂ ਨਾਲ ਵੀ ਮੁਲਾਕਾਤ ਕਰਨਗੇ। ਇਹ ਦੌਰਾ ਹਿੰਦ-ਪ੍ਰਸ਼ਾਂਤ (Indo-Pacific) ਖੇਤਰ ਵਿੱਚ ਸ਼ਾਂਤੀ ਅਤੇ ਸੁਰੱਖਿਆ ਨੂੰ ਬਣਾਏ ਰੱਖਣ ਲਈ ਦੋਵਾਂ ਦੇਸ਼ਾਂ ਦੀ ਸਾਂਝੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।